gowns

Trendy Gowns

ചുരുക്കം ചില വിവാഹവേദികളില്‍ മാത്രം കണ്ടിരുന്ന ഗൗണുകള്‍ ഇന്ന് ഫാഷന്‍ലോകത്തിന്റെ സ്പന്ദനമാണ്. ഗൗണ്‍ എന്നത് പാശ്ചാത്യവസ്ത്രമാണെന്ന സങ്കല്പത്തിന് മാറ്റം വന്നു കഴിഞ്ഞു. ഗൗണ്‍ ആര്‍ക്കും ധരിക്കാം. കൊച്ചു പെണ്‍‌കുട്ടികള്‍ മുതല്‍ യുവതികള്‍ വരെ. അത് നിങ്ങളുടെ ശരീരത്തിന് യോജിച്ചതാകണം എന്നു മാത്രം.

നിങ്ങളുടെ ശരീരപ്രകൃതിയാണ് ഗൗണിന്റെ ഫാഷന്‍ തീരുമാനിക്കുന്നത്. ഗൗണ്‍ തെരഞ്ഞെടുക്കുമ്പോള്‍ ഏത് തരം തുണിയാണ്, നിറമേതാണ്, ഏത് ഫാഷനാണ് എന്ന കാര്യങ്ങളും ശ്രദ്ധിക്കണം. തടിയല്പം കൂടുതല്‍ ഉള്ളവര്‍ക്ക് സ്ട്രയിറ്റ് ഫിററ് ഗൗണുകളാണ് (straight -fit gown) അനുയോജ്യം. പ്ലംങ്ങിങ്ങ് ബാക്ക് ഗൗണുകളും (plunging back gown) എംപയര്‍ ലൈന്‍കട്ട് (empire-line cut) ഗൗണുകളുമാണ് സ്ലിം ബ്യൂട്ടികള്‍ക്ക് ചേരുന്നത്. വേനല്‍ക്കാലത്ത് ഏറ്റവും ഇണങ്ങുന്നത് എംബ്രോയ്ഡറി ചെയ്ത ഫ്രഞ്ച് ഷിഫോണ്‍ ഡ്രേപ്ഡ് (french chiffon draped gown) ഗൗണുകളാണ്. പാര്‍ട്ടികള്‍ക്കു പഫ്ഡ് ഗൗണ് ‍(pouffed gown) ധരിക്കാം. ആദ്യകാലഫാഷനായ ഗ്രേഷ്യന്‍ സ്‌റ്റൈല്‍ ഡ്രേപ് ഗൌണിന് (grecian style drape gown ) ഇപ്പോഴും ആരാധകരുണ്ട്.

സാറ്റിന്‍, ഷിഫോണ്‍, സില്‍ക്ക് തുടങ്ങിയവയിലാണ് പൊതുവേ ഗൌണുകള്‍. ചിത്രത്തുന്നലുകള്‍ക്കും അലങ്കാരങ്ങള്‍ക്കും ഒപ്പം മുത്തും കല്ലുകളും ഒക്കെ പതിപ്പിച്ച ഗൗണുകളും സാധാരണമാണ്. മുന്‍പ് വിവാഹവേളയിലും അവാര്‍ഡ് വേദികളിലും മാത്രം ധരിച്ചിരുന്ന ഗൗണുകള്‍ ഇപ്പോള്‍ ഏത് ചടങ്ങിലും കാണാം. ആഘോഷവേളകളില്‍ ബോളിവുഡ്-ഹോളിവുഡ് സുന്ദരിമാരെക്കാള്‍ ചര്‍ച്ച ചെയ്യപ്പെടുന്നത് അവരുടെ വൈവിധ്യമാര്‍ന്ന ഗൗണുകള്‍ തന്നെ. സ്‌ത്രൈണചാരുതയെ വെളിവാക്കുന്നതിനൊപ്പം പ്രൗഢമാണെന്നതും ഗൗണുകളെ ഇഷ്ടവസ്ത്രമാക്കുന്നു.

| Gijimol P

seematti-transparent

ശീമാട്ടിയിൽ കാഞ്ചീപുരം വിവാഹോത്സവ്

അന്താരാഷ്‌ട്ര വനിതാദിനമായ മാർച്ച് എട്ടു മുതൽ ശീമാട്ടിയിൽ കാഞ്ചീപുരം വിവാഹോത്‌സവ് ആരംഭിച്ചു. സെമി- ട്രാൻസ്‌പെറന്റ് കാഞ്ചീപുരം സാരികളും ഷേയ്‌ഡഡ് കാഞ്ചിപുരം സാരികളുമാണ് ഈ സാരിമേളയുടെ പ്രത്യേകത. കാഞ്ചീപുരത്തിന്റെ ചരിത്രത്തിലാദ്യമായാണ് സെമി- ട്രാൻസ്‌പറന്റ് സാരികൾ അവതരിപ്പിക്കുന്നതെന്ന് സി ഇ ഒ ബീന കണ്ണൻ അറിയിച്ചു. അപൂർവമായ ഈ ലൈറ്റ്-വെയ്‌റ്റ് സാരികൾ ഉടുക്കാനും ധരിച്ചു നടക്കാനും സുഖപ്രദമാണ്. യുവത്വം തുളുമ്പുന്ന ട്രെൻഡിയായ ഈ സാരികൾ കല്യാണം, നിശ്ചയം, റിസപ്‌ഷൻ, പാർട്ടികൾ തുടങ്ങിയ ആഘോഷവേളകൾക്കെല്ലാം അനുയോജ്യം.

വൈവിധ്യമാർന്ന ഈ സാരി കളക്ഷനു വേറെയും സവിശേഷതകളുണ്ട്. 72 ശതമാനം സംശുദ്ധമായ സിൽവർ ജറിയും ഒറിജിനൽ സിൽക്ക് നൂലുകളും ഉൾപ്പെട്ട ഡിസൈനർ സാരി കളക്ഷനും ഗോൾഡ്, സിൽവർ, ആന്റിക് ജറിയുള്ള കാഞ്ചീപുരം കളക്‌ഷനും ഗോൾഡൻ വെഡ്ഡിംഗ് സാരികളും സിൽവർ കോൺട്രാസ്‌റ്റുള്ള ഓഫ്- വൈറ്റ് ബ്രൈഡൽ സാരികളും ഇവിടെയുണ്ട്. കൂടാതെ ആയിരം രൂപ മുതലുള്ള ഗിഫ്‌റ്റ് സാരി നിരയാണ് മറ്റൊരു സവിശേഷത. വധുക്കൾക്ക് മാത്രമല്ല, ബന്ധുക്കൾക്കും സുഹൃത്തുക്കൾക്കുമെല്ലാം വിവാഹസംബന്ധമായ എല്ലാ അവസരങ്ങൾക്കും ഇണങ്ങിയ സാരികൾ വിവാഹോത്സവിൽ അണിനിരക്കുന്നു.

ഇതിനിടെ ലിംകാ ബുക്ക് ഓഫ് റിക്കാർഡ്‌സിൽ വീണ്ടും ശീമാട്ടിക്ക് ഇടം ലഭിച്ചു. ഒരേ ദിവസം ഒരേ വേദിയിൽ ഏറ്റവും കൂടുതൽ കുട്ടികൾ വോട്ട് ചെയ്യുക എന്ന വിഭാഗത്തിലാണിത്. 2014 ലോകസഭാ തെരഞ്ഞെടുപ്പിനോടനുബന്ധിച്ച് കുട്ടികൾക്കായി ഒരു വോട്ടിംഗ് സംഘടിപ്പിച്ചതാണ് ശീമാട്ടിക്ക് ഈ നേട്ടം സമ്മാനിച്ചത്. ” നിങ്ങളുടെ സ്വപ്‌ന താരങ്ങൾക്ക് വോട്ട് ചെയ്യുക ” എന്ന പരിപാടിയിൽ 6024 കുട്ടികൾ വോട്ടിംഗിൽ പങ്കെടുത്തു.

applying-cream

ഫെയര്‍നെസ് ക്രീമുകള്‍ വേണ്ട

നിങ്ങള്‍ ഫെയര്‍ & ലവ്‌ലിയാണോ ഫെയര്‍ എവറാണോ ഉപയോഗിക്കുന്നത് ? വെളുക്കാനുള്ള നെട്ടോട്ടത്തിനിടയില്‍ ഇവയുടെ പാര്‍ശ്വഫലങ്ങളെക്കുറിച്ച് ചിന്തിച്ചിട്ടുണ്ടോ? ഒരു കാലത്ത് സ്ത്രീകള്‍ മാത്രമായിരുന്നെങ്കില്‍ ഇന്നിപ്പോള്‍ പുരുഷന്‍മാരും ഈ ഫെയര്‍ ജ്വരത്തിന് പുറകെയാണ്.

മുഖം വെളുപ്പിക്കാനായി മാര്‍ക്കറ്റില്‍ എത്തുന്ന ക്രീമുകളെല്ലാം തൊലിക്കു ഹാനികരമാണെന്നാണ് ചര്‍മ്മരോഗവിദഗ്‌ധര്‍ സാക്ഷ്യപ്പെടുത്തുന്നത്. തുടര്‍ച്ചയായി ഇത്തരം ക്രീമുകള്‍ ഉപയോഗിക്കുന്നതിലൂടെ നിങ്ങളെത്രയും വെളുക്കുന്നോ അത്രയും നിങ്ങളുടെ ചര്‍മ്മത്തിന് ദോഷകരമാണ്. ഫെയര്‍നെസ് ക്രീമുകള്‍ മുഖത്തെ പാടുകള്‍ മാറ്റുകയല്ല, മറയ്ക്കുകയാണ് ചെയ്യുന്നത്. അതിനാലാണ് ക്രീമിന്റെ ഉപയോഗം നിറുത്തുമ്പോള്‍ മുഖത്ത് കരുവാളിപ്പ് ഉണ്ടാകുന്നത്.

ഇത്തരം ക്രീമുകളിലെ പ്രധാന ഘടകം ബ്ലീച്ചാണ്. ഇതാണ് മുഖത്തിന് വെളുപ്പ് നല്‍കുന്നത്. ഈ ബ്ലീച്ച് തന്നെയാണ് ചര്‍മ്മത്തിന് ഹാനികരവും. ദീര്‍ഘകാലം ഇവ ഉപയോഗിച്ചാല്‍ ചര്‍മ്മത്തിന് മൃദുലത നഷ്ടമാകുന്നു. ദുര്‍ബലമായ ചര്‍മം അയഞ്ഞുതൂങ്ങും. മുഖത്ത് കുരുക്കളും പാടുകളും പെരുകും. പുരുഷന്‍മാരിലും താടിയും മീശയും ഉള്ള ഭാഗങ്ങള്‍ ഒഴിച്ചാല്‍ മറ്റുഭാഗം വളരെ സെന്‍സിറ്റീവാണ്. ഇവിടെ തീര്‍ച്ചയായും റിയാക്ഷൻ ഉണ്ടാകും.

ഇത് കൂടാതെ ഫെയര്‍നെസ് ക്രീമുകള്‍ ഫോട്ടോസെന്‍സിറ്റീവ് റിയാക്ഷന്‍ ഉണ്ടാക്കുമെന്നും ഡോക്‍ടര്‍മാര്‍ മുന്നറിയിപ്പ് തരുന്നു. ഫോട്ടോസെന്‍സിറ്റീവ് ആയതിനാല്‍ സൂര്യപ്രകാശം കൂടുതലായി ഏല്‍ക്കുന്നത് ചര്‍മരോഗങ്ങള്‍ക്കിടയാക്കും.ചുവപ്പ്, പിങ്ക് നിറത്തിലുള്ള പാടുകള്‍ മുഖത്തുണ്ടാകുന്നതാണ് പ്രാഥമിക ലക്ഷണം. പിന്നീട് സണ്‍ബേണ്‍, പൊള്ളല്‍ മൂലമുണ്ടാകുന്ന കുമിളകള്‍, ചൊറിച്ചില്‍, കരുവാളിപ്പ് എന്നിങ്ങനെ വ്യത്യസ്തമായ പാര്‍ശ്വഫലങ്ങള്‍ പലരിലുമുണ്ടാകും. ഇങ്ങനെ ഫോട്ടോസെന്‍സിറ്റിവായ ചര്‍മ്മം ഉള്ളവര്‍ ഏതെങ്കിലും മസാജിങ്ങ് ക്രീമോ ഓയിലോ ഉപയോഗിച്ചാല്‍ സ്‌ഥിതി കൂടുതല്‍ രൂക്ഷമാകും.

ചര്‍മ്മത്തില്‍ നിറഭേദവും വ്യത്യാസവും ഉണ്ടാകുന്നത് പലര്‍ക്കും പലവിധമാണ്. ചിലര്‍ക്ക് വളരെ പെട്ടെന്ന് ഇത് കാണുമ്പോള്‍ ചിലരില്‍ മാസങ്ങള്‍ക്ക് ശേഷമാകും വ്യതിയാനം. അതുകൊണ്ട്‌ ഫെയര്‍നെസ് ക്രീമുകള്‍ പാടേ ഉപേക്ഷിക്കുന്നതാണ് നല്ലത്. വെയിലേറ്റ് കരുവാളിപ്പുണ്ടാകാതിരിക്കാനും മൊരിച്ചില്‍ മാറ്റാനുമായി മോയ്‌സ്ചറൈസറുകളോ സണ്‍സ്‌ക്രീനോ ഉപയോഗിക്കാം. അതുമല്ലെങ്കില്‍ തൈര്, മഞ്ഞള്‍, കടലമാവ് തുടങ്ങിയ നാടന്‍പ്രയോഗങ്ങളാകാം.

| Gijimol P

www.glamdays.com