hair-removal

അമിതരോമം കളയാന്‍ 7 മാര്‍ഗങ്ങള്‍

ഷോര്‍ട്ട് സ്‌കര്‍ട്ട് ധരിക്കണമെന്നുണ്ട്. പക്ഷേ കാലിലെ രോമങ്ങള്‍ ? സുന്ദരിമാരുടെ ഉറക്കം കെടുത്തുന്ന സൗന്ദര്യപ്രശ്‌നമാണിത്. എന്നാലിതിന്റെ പേരില്‍ നിങ്ങള്‍ക്കിഷ്ടമുള്ള വസ്ത്രം ഒഴിവാക്കരുത്. അമിതരോമവളര്‍ച്ച ഇല്ലാതാക്കാന്‍ തീര്‍ച്ചയായും പോംവഴിയുണ്ട്. ചിലര്‍ക്ക് പാരമ്പര്യമാണിത്. ഇനിയൊരു വിഭാഗത്തിന് ചില മരുന്നുകളുടെ ഉപയോഗം മൂലമോ, ഹോര്‍മോണ്‍ തകരാറോ. എന്തുതന്നെയായാലും അനാവശ്യരോമങ്ങള്‍ കളയാനുള്ള ഏഴു മാര്‍ഗങ്ങള്‍.

കെമിക്കല്‍ ഹെയര്‍ റിമൂവേഴ്‌സ്
ചില കെമിക്കല്‍ ഉപയോഗിച്ചാല്‍ അനാവശ്യരോമങ്ങള്‍ നീങ്ങിക്കിട്ടും. ഇങ്ങനെയുള്ളവ മെഡിക്കല്‍ ഷോപ്പുകളില്‍ ലഭ്യമാണ്. എന്നാല്‍ ഒരു ഡോക്ടറുടെ നിര്‍ദേശപ്രകാരം വാങ്ങുക. കെമിക്കലുകള്‍ ഉപയോഗിക്കും മുന്‍പ് അലര്‍ജിയില്ലെന്ന് ഉറപ്പുവരുത്തണം. വെന്റിലേഷന്‍ സംവിധാനമുള്ള മുറിയിലിരുന്നു വേണം ട്രീറ്റ്‌മെന്റ്. ഇല്ലെങ്കില്‍ തലവേദനയും അനുബന്ധപ്രശ്‌നങ്ങളും ഉണ്ടാകും. ഹെയര്‍ റിമൂവിങ്ങ് ക്രീമുകളും അലര്‍ജിയില്ലെന്ന് ഉറപ്പ് വരുത്തി ഉപയോഗിക്കണം.

ബ്ലീച്ചിങ്ങ്
കറുത്ത നിറമുള്ള രോമത്തിന്റെ നിറവും കനവും കുറയ്ക്കുകയാണ് ബ്ലീച്ചിങ്ങിലൂടെ ചെയ്യുന്നത്. കഴുത്ത്, മുഖം, കൈകാലുകള്‍ തുടങ്ങിയ ഇടങ്ങളിലെ രോമം ഇങ്ങനെ നിറംമാറ്റാം.

ഷേവിങ്ങ്
സാധാരണ ചെയ്യുന്ന ഹെയര്‍ റിമൂവിങ്ങാണിത്. ഷേവിങ്ങ് ക്രീം, ബോഡിവാഷ്, ഹെയര്‍ കണ്ടീഷണര്‍ ഇവയിലേതെങ്കിലും പുരട്ടിയതിന് ശേഷമാണ് ഷേവ് ചെയ്യേണ്ടത്. ചര്‍മ്മത്തില്‍ മുറിവുകള്‍ വീഴാതിരിക്കാന്‍ ഇത് സഹായകമാണ്. രോമങ്ങളുടെ ചുവട് ചേര്‍ത്ത് വെട്ടുകയാണ് ഷേവിങ്ങില്‍ ചെയ്യുന്നത്. അതിനാല്‍ അടുത്തദിവസം തന്നെ രോമം വളരാന്‍ ഇടയാകും. ഇത് മൂലം ദിവസവും ഷേവ് ചെയ്യേണ്ടതായി വരും.

പ്ലക്കിങ്ങ്
ഹെയര്‍ ഫോളിക്കിളില്‍ നിന്ന് രോമം പിഴുത് മാറ്റുകയാണ് ഇത്. ട്വീസേഴ്‌സ് ഉപയോഗിച്ച് സമയമെടുത്ത് ചെയ്യേണ്ട പ്രക്രിയയാണ്. നീളമുള്ള രോമങ്ങള്‍ മാത്രമേ ഇങ്ങനെ പിഴുത് കളയാനാകൂ. രോമം വളരുന്നതിന് ഇതിലൂടെ കാലതാമസം ഉണ്ടാകും.

വാക്‌സിങ്ങ്
ഹെയര്‍ ഫോളിക്കിളില്‍ നിന്ന് രോമം കളയാനുള്ള മറ്റൊരു മാര്‍ഗം. ഇതിനായുള്ള വാക്‌സ് വാങ്ങി വീട്ടില്‍ ചെയ്യാം. വാക്‌സ് ചൂടാക്കി രോമവളര്‍ച്ചയുടെ ദിശയില്‍ പുരട്ടുക. വാക്‌സ് രോമത്തില്‍ നന്നായി പിടിച്ചതിന് ശേഷം വളര്‍ച്ചയുടെ എതിര്‍ദിശയില്‍ ഇവ വലിച്ചെടുക്കുക. കാലുകളിലും കൈകളിലും ഒരേ സമയം ധാരാളം രോമം നീക്കം ചെയ്യാനിത് ഫലപ്രദമാണ്. കോള്‍ഡ് വാക്‌സ്, ഷുഗര്‍ വാക്‌സ് എന്നിവ വിപണിയില്‍ ലഭ്യമാണ്.

ഇലക്ട്രോളിസിസ്
രോമവളര്‍ച്ച തടയാനുള്ള വഴി കൂടിയാണ് ഇലക്ട്രോളിസിസ്. ഹെയര്‍ ഫോളിക്കിളിലേക്ക് സൂചി കടത്തുന്നു. ഇതിലൂടെ ഇലക്ട്രിക് കറന്റ് കടത്തിവിട്ട് രോമത്തിന്റെ വേരടക്കം കരിച്ചുകളയുന്നു. പാര്‍ലറുകളിലും ക്ലിനിക്കിലുമാണ് ചെയ്യുന്നത്. വിദ്ഗ്‌ധരെ കൊണ്ടു മാത്രമേ ഇലക്ട്രോളിസിസ് ചെയ്യിക്കാവൂ.

ലേസര്‍ ട്രീറ്റ്‌മെന്റ്
പെര്‍മനന്റ് ഹെയര്‍ റിമൂവല്‍ മെത്തേഡാണ് ഇത്. വ്യത്യസ്തമായ തരംഗദൈര്‍ഘ്യം ഉള്ള പ്രകാശതരംഗങ്ങള്‍ രോമകൂപങ്ങളിലേക്ക് കടത്തിവിടുകയാണ് ഇതില്‍ ചെയ്യുന്നത്. ബ്യൂട്ടിക്ലിനിക്കില്‍ ചെയ്യേണ്ട ഈ ട്രീറ്റ്‌മെന്റ് വളരെ ചെലവേറിയതാണ്.

| Gijimol P

silver-ornaments

വെള്ളി മിന്നിത്തിളങ്ങാന്‍

ഒറ്റനോട്ടത്തില്‍ പ്ലാറ്റിനവും സില്‍വറും ഒരുപോലെ. വളരെ കുറഞ്ഞ ചെലവില്‍ വെള്ളി ആഭരണങ്ങള്‍ വാങ്ങുകയും ചെയ്യാം. അതിനാല്‍ വെള്ളി ആഭരണങ്ങള്‍ക്ക് ഡിമാന്‍ഡ് കൂടുകയാണ്. പക്ഷേ ഒറ്റ കുഴപ്പമേയുള്ളു നന്നായി ശ്രദ്ധിച്ചില്ലെങ്കില്‍ ഇവ കറുത്ത് പോകും. തിളക്കമില്ലെങ്കില്‍ വെള്ളി ആഭരണങ്ങള്‍ പിന്നെന്തിന് കൊള്ളാം? സ്വര്‍ണ്ണത്തേക്കാള്‍ പരിചരണം അവയ്ക്കാവശ്യമാണ്. വെള്ളി മിന്നിത്തിളങ്ങാന്‍ ഇനി പറയുന്നകാര്യങ്ങള്‍ ശ്രദ്ധിക്കുക.

സില്‍വര്‍ ക്ലീന്‍ ചെയ്യാനായി കോട്ടണോ ഫ്ലാനലോ മാത്രമേ ഉപയോഗിക്കാവൂ. പോറലുകള്‍ ഒഴിവാക്കാനാണിത്. ആന്റി ടാര്‍ണിഷിങ്ങ് ആയിട്ടുള്ള സില്‍വര്‍ ക്ലീനിങ്ങ് ക്ലോത്ത് വാങ്ങാനും കിട്ടും. സോപ്പും ചെറുചൂടുവെള്ളവും കുട്ടികളുടെ ടൂത്ത് ബ്രഷും ഉപയോഗിച്ച് വളരെ വേഗം വെള്ളി ആഭരണങ്ങള്‍ വൃത്തിയാക്കാം. ഇതല്ലാതെ സില്‍വര്‍ ക്ലീനറുകളും വിപണിയില്‍ വാങ്ങാന്‍ കിട്ടും. സില്‍വര്‍ ഡിപ് എന്നാണ് ഇവയ്ക്ക് പേര്. സില്‍വര്‍ ഡിപ്പില്‍ ആഭരണം മുക്കിയാല്‍ അവയുടെ യഥാര്‍ത്ഥ നിറവും തിളക്കവും തിരിച്ച് വരും. സില്‍വര്‍ ക്ലീനര്‍ പേസ്റ്റ് ഒരു തുണിയില്‍ മുക്കി ആഭരണത്തില്‍ തുടയ്ക്കുക. പേസ്റ്റ് ഉണങ്ങിക്കഴിഞ്ഞാല്‍ നന്നായി കഴുകി തുടയ്ക്കുക. ആഭരണം മിന്നിത്തിളങ്ങും.

അലുമിനിയം ഫോയിലുള്ള ഒരു പോട്ട് എടുത്ത് അതില്‍ എട്ടുകപ്പ് വെള്ളം ഒഴിക്കുക. കാല്‍ കപ്പ് ബേക്കിംഗ് സോഡയും കാല്‍ കപ്പ് ഉപ്പും ഇട്ട് നന്നായി ഇളക്കണം. ഇതി്ല്‍ വെള്ളി ആഭരണം ഇടാം. ഇനി കുറച്ച് സമയം ചൂടാക്കുക. ബര്‍ണര്‍ ഓഫ് ചെയ്ത് രണ്ടുമൂന്ന് മിനിട്ടിന് ശേഷം തണുത്ത വെള്ളത്തില്‍ ആഭരണം കഴുകുക. ആഭരണം പുതിയത് പോലിരിക്കും.

ഉപയോഗിക്കാത്ത വെള്ളി ആഭരണങ്ങള്‍ നന്നായി പൊതിഞ്ഞ് ബാഗില്‍ അടച്ച് സൂക്ഷിക്കണം. തുറന്നു വച്ചാല്‍ ഇവയുടെ നിറം മങ്ങും. മറ്റ് ആഭരണങ്ങള്‍ക്കൊപ്പം വച്ചാല്‍ പോറലുകള്‍ വീഴുമെന്ന് മാത്രമല്ല കറുത്ത് പോകുകയും ചെയ്യും. തടി, പേപ്പര്‍, കാര്‍ഡ്‌ബോര്‍ഡ് എന്നിവ കൊണ്ടുള്ള പെട്ടിയിലും ഇവ വയ്‌ക്കരുത്. പെട്ടെന്ന് നിറംമാറ്റമുണ്ടാകുന്നതിനാലാണിത്.

| Gijimol P

bags

ബാഗിനും മോയ്‌സ്ചറൈസര്‍

നല്ല വില കൊടുത്ത് വാങ്ങിയ ലതര്‍ബാഗ് ഒന്നു നനഞ്ഞപ്പോള്‍ expiry date കഴിഞ്ഞ അവസ്ഥയിലായി എന്ന് പരിതപിക്കുന്നവരുടെ ശ്രദ്ധയ്‌ക്ക്. നമ്മുടെ ചര്‍മ്മം പോലെ തന്നെ ബാഗുകള്‍ക്കും മോയ്‌സ്ചറൈസര്‍ ആവശ്യമാണ്. ഇല്ലെങ്കില്‍ അവ പെട്ടെന്ന് വിണ്ടുകീറും.

Vegetable tanned leather bag ആണെങ്കില്‍ ഒട്ടും പ്രശ്‌നമില്ല. കടുംനിറങ്ങളിലുള്ള ഇവയ്ക്ക് ദീര്‍ഘകാലക്ഷമതയും ബലവുമുണ്ട്. അതല്ല സാധാരണബാഗാണെങ്കില്‍ മഴയില്‍ നനഞ്ഞാല്‍ ചെയ്യേണ്ടത് ഇത്രമാത്രം. ആദ്യം അതിനകത്തുള്ള വസ്തുക്കള്‍ എടുത്തുമാറ്റണം. എന്നിട്ട് ഈര്‍പ്പം തട്ടാത്ത സ്ഥലത്തോ ഒരു എയര്‍കണ്ടീഷന്‍ഡ് റൂമിലോ വയ്ക്കണം. ഹീറ്ററിന് മുകളില്‍ പിടിച്ച് ചൂടുപിടിപ്പിക്കുകയോ സൂര്യപ്രകാശത്തില്‍ വയ്ക്കുകയോ ചെയ്യരുത്. ഇത് ലെതറിലുള്ള പ്രകൃതിദത്തമായ ഓയിലിനെ നശിപ്പിക്കുകയും ബാഗിന്റെ മൃദുലത നഷ്ടപ്പെടുത്തുകയും ചെയ്യും. അതോടെ പെട്ടെന്ന് തന്നെ ലതര്‍ കട്ടിപിടിക്കുന്നതിനും വിണ്ടുകീറുന്നതിനും ഇടയാകും.

ബാഗ് ഉണങ്ങിയതിന് ശേഷം നല്ലൊരു ക്രീമോ വാക്‌സോ ലതര്‍ ബാഗിന് മുകളില്‍ പുരട്ടാം. ക്രീം പഞ്ഞി ഉപയോഗിച്ച് തൂത്ത് പിടിപ്പിക്കണം. ബാഗിന് മൃദുലതയും തിളക്കവും കിട്ടും. മഴക്കാലത്ത് ഇങ്ങനെ ചെയ്യുന്നത് കൊണ്ട് ഫംഗസ് ബാധയും തടയാം. വളരെക്കാലം പുതുപുത്തന്‍ പോലിരിക്കാന്‍ ലതര്‍ബാഗുകള്‍ തുണിസഞ്ചിയിലോ തുണിയിലോ പൊതിഞ്ഞ് സൂക്ഷിക്കാം. പൊടിയില്‍ നിന്നും ഈര്‍പ്പത്തില്‍ നിന്നും ബാഗിനെ രക്ഷിക്കാനും ഇതാണ് നല്ലത്.

| Gijimol P

www.glamdays.com