makeup

Makeup: ആണിനെ അകറ്റുന്ന 10 കാര്യങ്ങള്‍

കടുംനിറമുള്ള ലിപ്‌സ്‌ററിക്,വച്ചു പിടിപ്പിച്ച കണ്‍പീലികള്‍ ….ഇതെല്ലാം ഉണ്ടെങ്കില്‍ പുരുഷന്‍മാരെ ആകര്‍ഷിക്കാം എന്ന് കരുതരുത്. ഇത്തരം മേക്കപ്പ് ജ്വരം ആണുങ്ങള്‍ക്ക് അലര്‍ജിയാണെന്നാണ് പുതിയ കണ്ടെത്തല്‍. സ്വാഭാവിക സൗന്ദര്യമാണ് പുരുഷന്‍മാരെ ആകര്‍ഷിക്കുന്നതത്രേ.

പുരുഷന്‍മാരില്‍ അഞ്ചിലൊന്നിനും പങ്കാളി അമിതമേക്കപ്പ് അണിയുന്നതില്‍ താല്പര്യമില്ലാത്തവരാണ്. പത്തിലൊരാള്‍ക്ക് മേക്കപ്പ് ഒട്ടുമില്ലാത്തവരെയാണ് താല്പര്യം. കൃത്രിമകണ്‍പീലികള്‍, കടുത്ത ലിപ്സ്റ്റിക്ക്, വളരെ കറുപ്പിച്ച് നീട്ടിയെഴുതിയ ഐ ലൈനര്‍, കടുംനിറമുള്ള ലിപ് ലൈനര്‍, വരച്ച് കറുപ്പിച്ച പുരികം തുടങ്ങിയവയാണത്രേ പുരുഷന്‍മാരുടെ കരിമ്പട്ടികയിലുള്ളത്. ഒന്നരയിഞ്ച് കനത്തില്‍ മുഖത്ത് ഫൗണ്ടേഷന്‍ ഇടുന്നവര്‍ക്കും നോ എന്‍ട്രി തന്നെ. തലേദിവസത്തെ മേക്കപ്പ് കളയാതെ കിടന്നുറങ്ങിയാല്‍ രാവിലെ കണ്ണിനു ചുറ്റും കരി വാരി പുരട്ടിയതു പോലെയിരിക്കും. ഇതും പുരുഷന്‍മാരില്‍ വെറുപ്പുളവാക്കുമത്രേ.

വളരെ ലളിതമായി ഒരുങ്ങുന്നതാണ് പലര്‍ക്കും ഇഷ്ടമെന്നും പഠനം വെളിപ്പെടുത്തുന്നു. എന്നാല്‍ ഇവര്‍ക്ക് ഇത് പങ്കാളിയോട് തുറന്ന് പറയാന്‍ മടിയാണെന്നതാണ് രസകരമായ വസ്തുത. സ്ത്രീകള്‍ക്ക് അവരുടെ സൗന്ദര്യത്തില്‍ സംതൃപ്തി ഇല്ലാത്തതാണ് ഈ അവസ്ഥയ്ക്ക് കാരണമത്രേ. ചര്‍മ്മത്തിലെ പാടുകളും പോരായ്മകളും മായ്ക്കാനാണ് പലരും മേക്കപ്പ് ചെയ്യുന്നത്. അല്ലാതെ ആകര്‍ഷിക്കാന്‍ മാത്രമല്ലെന്നാണ് സ്‌ത്രീ വാദം.

പഠനവിധേയരായവരില്‍ പതിനഞ്ച് ശതമാനം സ്ത്രീകളും മേക്കപ്പില്ലാതെ പുറത്തിറങ്ങാന്‍ മടിക്കുന്നവരാണ്. മേക്കപ്പില്ലാതെ ഭര്‍ത്താവിന്റെയോ സുഹൃത്തുക്കളുടെയോ മുന്‍പില്‍ ചെല്ലാന്‍ പോലും താല്പര്യമില്ലാത്തവരുമുണ്ട്. സ്വന്തം സൗന്ദര്യം കൊള്ളാമെന്ന് സ്ത്രീക്ക് ആത്മവിശ്വാസം ഉണ്ടെങ്കില്‍ അമിതമായ മേക്കപ്പിന്റെ ആവശ്യം തന്നെ ഇല്ലെന്നാണ് സൗന്ദര്യവിദഗ്‌ധരുടെ അഭിപ്രായം. ഇനി മേക്കപ്പിട്ടാലും ചില കാര്യങ്ങള്‍ ഒഴിവാക്കുന്നതു കൊള്ളാം.

1. പല്ലില്‍ പറ്റിപ്പിടിച്ചിരിക്കുന്ന ലിപ്സ്റ്റിക്ക്
2. ആവശ്യത്തിലധികം ബ്ലഷ് ചെയ്ത കവിള്‍
3. കനത്തില്‍ ഇട്ട ഫൗണ്ടേഷന്‍
4. കടുപ്പിച്ച് വരച്ച് കനം കൂട്ടിയ കണ്ണുകള്‍
5. കണ്‍പീലികളില്‍ കൂടിപ്പിടിച്ചിരിക്കുന്ന മസ്‌കാര
6. കടുംവെട്ട് നിറമുള്ള ലിപ്സ്റ്റിക്ക്
7. മുഖവും കഴുത്തും രണ്ടു നിറത്തിലാക്കുന്ന ഫൗണ്ടേഷന്‍ പ്രയോഗം
8. കടുംനീല ഐഷാഡോ
9. കടുപ്പിച്ച് വരച്ച പുരികം
10.കറുപ്പിച്ച് നീട്ടിയെഴുതിയ ഐലൈനര്‍

| Gijimol P

bling-bags

മിന്നിത്തിളങ്ങും Blingy Bags

രത്‌നങ്ങള്‍ ഇപ്പോള്‍ ബാഗിനുള്ളില്‍ സൂക്ഷിക്കാനല്ല, അവയുടെ പുറത്തു പതിപ്പിക്കാനുള്ളതാണ്. മനസിലായില്ലെങ്കില്‍ bling bags ഒന്നു കണ്ടു നോക്കൂ. സെമി പ്രഷ്യസ് സ്റ്റോണുകളായ സ്‌മോക്കി ടോപാസ്, ക്വാര്‍ട്‌സ്, കോറല്‍, ടര്‍ക്വായിസ് , അമേതിസ്‌ററ് എന്നിവ പതിച്ചിരിക്കുന്നു ഈ ബാഗുകളില്‍.

വളരെ ലളിതമായ വസ്ത്രധാരണത്തില്‍ പോലും എലഗന്റ് ലുക്ക് നല്‍കാന്‍ ഇത്തരം ബാഗുകള്‍ ധാരാളം മതിയെന്നാണ് ഫാഷന്‍ ലോകത്തെ സംസാരം. ഡള്‍ ഗോള്‍ഡ്, ബ്ലാക്ക് ഗ്രേ, ചുവപ്പ്, പച്ച എന്നീ നിറങ്ങളാണ് ബാഗുകള്‍ക്ക്. വസ്ത്രങ്ങള്‍ക്ക് ചേരുന്ന ബാഗുകള്‍ക്കാണ് വിപണിയില്‍ ഡിമാന്‍ഡുള്ളത്. കുന്ദന്‍ വര്‍ക്കും ക്രിസ്റ്റലും ഉള്ള ബാഗുകള്‍ ആഭരണങ്ങളുമായി നന്നായി ചേരും. മിനാകാരി വര്‍ക്കില്‍ റൂബിയും എമറാള്‍ഡും ചേരുന്ന ഷോപ്പിങ്ങ് ബാഗുകള്‍ക്കും clutches (സ്‌ട്രാപ്പില്ലാത്ത ബാഗുകള്‍) നും ആഡംബരത്തിനൊപ്പം വിലയും കൂടും. പരമ്പരാഗതതനിമയും ഒപ്പം പാശ്ചാത്യഭംഗിയുമുള്ള clutches ആണ് സ്ത്രീകള്‍ക്കിഷ്ടം. സ്വരോവ്‌സ്‌കി ക്രിസ്റ്റലും പേളും പതിച്ച ഇവ എക്‌സ്ട്രാഓര്‍ഡിനറി ലുക്ക് നല്‍കും. ബോളിവുഡ് താരങ്ങളുടെ പ്രിയപ്പെട്ട കോമ്പിനേഷന്‍ ആണിത്.

വെഡ്ഡിങ്ങ് റിസപ്ഷനുകളില്‍ വേറിട്ട് നില്‍ക്കാന്‍ Zari-Zardosi ഹാന്‍ഡ് ബാഗുകളാണ് അനുയോജ്യം. എന്നാല്‍ വസ്ത്രവുമായി യോജിക്കണമെന്ന് മാത്രം.എംബ്രോയ്ഡറി ചെയ്ത ഈവനിംഗ് ഷോപ്പിംഗ് ബാഗുകളുമുണ്ട്. മെറ്റീരിയല്‍, ഡിസൈന്‍ വര്‍ക്ക് എന്നിവയ്‌ക്ക‌നുസരിച്ചാണ് ബാഗുകളുടെ വില. ഇത് 2000 മുതല്‍ 10,000 വരെ ആകാം. എന്നാല്‍ റൂബി, കോറല്‍, എമറാള്‍ഡ് എന്നീ കല്ലുകള്‍ പതിച്ചവയ്ക്ക് 80,000-90,000 എന്നീ റേഞ്ചിലാണ് വില.

| Gijimol P

nithya-threading

ത്രെഡ് ചെയ്യുമ്പോള്‍ വീതി കുറയ്‌ക്കല്ലേ

ഈര്‍ക്കില്‍ വലുപ്പത്തിലുള്ള പുരികം പഴങ്കഥ. ഇപ്പോഴത്തെ സ്‌റ്റൈല്‍ കറുകറുത്ത ഇടതൂര്‍ന്ന പുരികമാണ്. നനുത്ത പുരികത്തിന് പിന്നാലെ പോയവര്‍ ഇപ്പോള്‍ ഹെയര്‍ ട്രാന്‍‌സ്‌പ്ലാന്റേഷനിലൂടെ നഷ്ടപ്പെട്ട പുരികം വീണ്ടെടുക്കാന്‍ ശ്രമിക്കുകയാണ്.

പ്ലക്കിങ്ങിലൂടെ പുരികം കൂടുതലായി നഷ്ടപ്പെട്ടാല്‍ ഇവ പിന്നീട് പഴയത് പോലെ വളരാറില്ലെന്നതാണ് വാസ്തവം. സ്വാഭാവികമായി കനം കുറഞ്ഞ പുരികമുള്ളവരുമുണ്ട്. ഇങ്ങനെയുള്ളവര്‍ക്കെല്ലാം ശാശ്വതമായ പരിഹാരം ഹെയര്‍ ട്രാന്‍‌സ്‌പ്ലാന്റേഷന്‍ മാത്രമാണ്. ഇതിനായി എത്തുന്ന സ്ത്രീകളുടെ എണ്ണം മുന്‍ വര്‍ഷത്തെക്കാള്‍ ഇരട്ടിയായിട്ടുണ്ടെന്നാണ് ക്ലിനിക്കുകളിലെ കണക്ക്. രണ്ടു ലക്ഷം രൂപയ്‌ക്ക് മുകളിലാണ് ഇത്തരം സര്‍ജറിക്ക് ചെലവ് വരിക.

1980കളില്‍ വീതിയേറിയ പുരികമായിരുന്നു ഫാഷന്‍. എന്നാല്‍ 90 കള്‍ മുതല്‍ കനം കുറഞ്ഞ് വില്ലുപോലെ വളഞ്ഞ പുരികങ്ങള്‍ക്ക് പിന്നാലെയായിരുന്നു സുന്ദരിമാര്‍. എന്നാലിപ്പോള്‍ കാറ്റ് തിരിച്ച് വീശിയിരിക്കുകയാണെന്ന് മാത്രം. ഇനി ഈ ട്രെന്‍ഡ് മാറിമറിയാനും അധികകാലം വേണ്ട. എങ്കിലും ത്രെഡ് ചെയ്യുമ്പോള്‍ ഒന്നോര്‍ക്കുക. ഇടതൂര്‍ന്ന മനോഹരമായ പുരികങ്ങള്‍ ഒരിക്കല്‍ നഷ്ടപ്പെട്ടാല്‍ പിന്നീട് അതേ അവസ്ഥയില്‍ തിരിച്ച് കിട്ടില്ല.

| Gijimol P

www.glamdays.com